e Fabio WolfPer num Duperdu el Spirit de Milan l’è on tocch de coeur: l’hemm vist insema al noster amis Luca Locatelli in del 2014, quand l’era domà on’idea, la sira che luu n’ha portaa in sul pontesell de la ferrovia per mirall de l’alt. Serom là in del 2015 quand insema al local l’è nassuda anca la nostra fioeula Dalia, e per quel sit meraviglios hemm subit compost ona canzon che l’è ancammò “l’inno official”, naturalment in milanes! Serom là fin a la fin de magg 2026. In quasi vundes ann quej mur hann vist passà fior de musicista, cantant, attor, danzator, donn e omen de spettacol e de cultura, e anca on monton de gent, che la s’è innamorada de l’ambient, de la gentilezza e del podè vess là domà per stà ben, in compagnia, senza l’obbligh de la consumazion per godè de la bona musica del viv. E poeu el ristorant sott’a la direzion de la mitica Mariuccia, indove gustà ona coteletta sopraffina e i piatt de la cusina lombarda. El Spirit l’è on presidi de “milanesitaa”, de la nostra bella tradizion meneghina, fada minga domà de canzon d’osteria, ma anca de poesia e, soratutt, de socialitaa. Senza preavvis, la proprietaa de l’immobil l’ha cessà el contratt de fitt e l’ha cambiaa i serratur nottetemp e inscì sessanta lavorator del Spirit sont restaa cont on palm de nas e num tucc ne sentom orfen de on post che n’ha daa bellezza, divertiment e affett ogni volta che l’hemm vivuu. A hinn i regol del mercaa, disen, se fa tutt per i dané. Ma “el dané el danna”, i proverbi sbaglien no.