e Fabio WolfEl parch Lamber l’era el polmon verd pussé grand de Milan: el architett Casiraghi in del 1936 el progetta on ambient che l’è on’ enciclopedia del paesagg lombard, traversaa e pontellaa de l’acqua, cont rogg, laghett e, naturalment, el fium Lamber. Ona meraviglia che in temp de guerra la gent l’ha devastaa per fà la legna per scaldass i oss. El parch el rinass in di ann ‘50 e in di ann ‘70 l’inquinament rend necessari prosciugà i duu lach, ma ‘dess in del Lamber se torna a vedè pess e osei acquatich. Incoeu sò noeuvcent meter quader a hinn diventaa settcent dopo l’espansion del cimiteri de Lambraa e la costruzion de la tangenzial. Denter el parch ghe sont cinq cassinn, voeuna l’è restada in attivitaa, i alter a hinn diventaa presidi de socialitaa. Famosa l’è l’associazion Exodus, del Don Mazzi e la Cassina Biblioteca, indove sto “uichend” gh’è el “Ti Ribalto Festival”, pontell de oramai des ann per celebrà art e teater inclusiv cont on fracch de spettacol e laboratori a gratis, per cuntà la disabilitaa al de foeura de schemi e stereotipi, cont pussé de sessanta attor e attriz cont disabilitaa de la Piccola Accademia.El tema de ‘sta edizion l’è la forza della narrazion, minga domà teater, ma ona festa indove ogni vos la troeuva el sò spazzi. Num de Minima Theatralia semm in programma cont “Making of”, el compendio del grand colossal teatral-musical andaa in scena al Teater Elfo Puccini cont la nostra compagnia de 80 person different. Allora se vedom là!