e Fabio WolfEl FringeMI Festival l’è in tutta Milan, la cittaa l’è traversada de l’art! Ma cossa l’è sta robba chì? L’è ona rassegna de spettacol del viv che la se tegn in di spazzi minga pensaa per el teater, indove la vicinanza cont el pubblich l’è ona component essenzial e i sit pussè disparaa de i quartee diventen “terzo luogo” e se trasformen in d’on pont de socialitaa, on’occasion per la popolazion de incontrass, stà insema e godè de la bellezza. El nass in del 2019 come NoLo Fringe, poeu in del 2022 el se slarga e el se diffond. Realizzaa de Bardha Mimòs del Davide Verrazzani e de la Ippolita Aprile, el Festival in di sò sett edizion l’ha coinvolt pussè de vintmilla spettator e l’è diventaa voeuna important rassegna de teater indipendent, grazie anca a la capacitaa organizzativa de quel portent de la Giulia Brescia. El programma l’è sintetizzaa inscì: rigenerazion urbana e innovazion cultural. 17 i quartee interessaa, de NoLo a Lambraa, de Derghen al Lorentegg, de Porta Romana a Grech. Pussè de dusent compagnie in sedes dì de spettacol: ghe n’è per tucc. La gh’è financa la Carrozzeria Orfeo (in la foto). E i sit, poeu! La gesetta del Trotter, el Refettori Ambrosian, La Cassina Cuccagna, el Spazzi Tadini, per dinn on quaivun. Se spazzia de la musica a la danza, al teater: tucc propost de minga perd e event a gratis, in su l’internet gh’è l’imbarazzi de cattà foeura e te vegn voeuia de vedej tucc… E allora, andemm on poo a spass per el nost Milan a sentì l’arietta de giugn!