<p>Sa kabila ng matinding emosyon sa pag-alis ng kanilang padre de pamilya na isang overseas Filipino worker, nasingitan pa rin ito ng tawanan dahil sa biro ng anak tungkol sa pag-iyak ng kanilang ina.</p><p>Sa ulat ng GMA News Feed, napag-alaman na umuwi para magbakasyon ng dalawang linggo sa Pilipinas ang amang OFW na si R-jay.</p><p>Pitong taon na siyang nagtatrabaho sa South Korea at isang land-based ship building worker sa isa pagawaan ng barko sa nasabing bansa.</p><p>Kaya naman bihira lang makapiling at maka-bonding ni R-jay ang kaniyang dalawang anak na sina Atara, 10-anyos at Elicia, 7-anyos.</p><p>Pero nang dumating na ang araw na kailangan na niyang bumalik sa Korea, makikita sa video kung gaano katindi ang iyak at lungkot ng dalawang anak.</p><p>Ang asawa naman ni R-jay na si Christine, pinipigilan ang pag-iyak dahil kailangan niyang magpakatatag para sa dalawang anak.</p><p>Nang magbilin na si R-jay kay Christine na mag-ingat sila ng kanilang mga anak at magsabi na na mag-book ng sasakyan papuntang airport, hindi na napigilan ni Christine ang pagbuhos ng kaniyang emosyon at luha.</p><p>Pero ang kanilang iyakan, nahaluan ng tawanan dahil sa mapagbiro nilang panganay.</p><p>“Mommy, ang pangit mo Ma,” sabi ni Atara nang makitang umiyak na ang kaniyang ina.</p><p>Kaya naman ang emosyonal na pamilya, naging iyak-tawa!</p><p>Sadya raw masayahin ang pamilya nina Christine at R-jay, at nakuha raw ng mga bata ang sense of humor ni Christine na malakas mang-asar.</p><p>Malungkot man sila sa muling pag-alis ni R-jay, naisingit pa rin ng pamilya ang maging masaya na sama-sama. – <strong>Jamil Santos/FRJ GMA News</strong></p>