e Fabio Wolf Stavolta l’appontament l’è in quell gioiellin del Teater Gerolamo, indove la ghe sarà l’anteprima de on spettacol davvera intéressant e pienn de vera umanitaa: “Romeo e Giulietta - Spettro d’amore”. In scena la compagnia “Fondazione Un futuro per l’Asperger”, nassuda in del 2019 per trasformà le fragilitaa de i giovin cont problemi de autismo in competenz de spend in la vitta de tutt i dì. La drammaturgia e la regia sont de on’artista sensibel e original: l’Alice De André, nevoda del grand Faber. L’è ona riscrittura del Bardo e a interpretala sont des giovin attor cont problemi de neurodivergenza. El spettacol alterna la comicitaa dissacrante e la profonditaa de l’emozion. El dramma shakespearian el diventa on specc di relazion al dì d’incoeu, de paur, de sforz per comunicà e per vess accettaa de i alter. In sul palch la Beatriz Papa, el Morgan Radice, el Luis Lotto, l’Ilaria Dell’Acqua, el Fabio Valcarenghi, el Tommaso Noci, el Fabio Paolini, el Javier di Benedetto e el Peder Lucchini, in d’on spettacol che’l parla de diversitaa, comunicazion, identitaa e relazion, per capì cossa el voeur dì incoeu mettes in mostra e anca ris’cià, ma, quand el final el sembra giammò scrivuu, el ciappa ona piega sorprendent che la riscriverà i regol del gioeugh e la lassa el pubblich sospes fra emozion, stupor e possibilitaa. Bagaj che primma faticaven domà a parlà, incoeu poden recità monologhi dinnanz a un monton de person: l’è questa la forza del Teater!